Dili, 21/8/2026 Numeru kazu HIV ne’ebé aumenta ba beibeik laos de’it tanba ita (ema) la konsege konduz ka kontrola ona ita moral hodi moris libre ho atividade seksual ikusmai rezulta kazu HIV aumenta as iha Timor-Leste.
Prezidente Instituto Nacional de Combate ao HIV-SIDA.IP, Daniel Marçal nia intervensaun iha seminariu sensibilizasaun HIV-SIDA no Moras Hadet Relasaun Seksual ba funsionáriu Autoridade Municipio de Dili deklara katak los duni katak HIV-SIDA ne’e kestaun saude saude nian maibé nia kauza lolos ne’e kestaun moral laos de’it jovem sira de’it maibé ita hotu, ita sira ne’ebé moris ona ho parseiru ne’ebé legal mos ita senti nesesidade seksual entre fen ho laen de’it seidauk to’o ba ita, ita sei hakarak bosok ita nia an no konsiénsia hodi buka halo tan relasaun seksual iha liur.
‘’Kazu HIV as iha Timor-Leste nia kauza boot ne’e kestaun degradasaun moral, ita involve makas liu atividade seksual ne’ebé laiha responsabilidade’’ dehan Daniel Marçal
Daniel Marçal haforsa tan problema HIV iha Timor-Leste nia kauza ne’e tanba relasaun seksual ne’e la seguru no agora ema barak, inan-feton no labarik barak moris terus hela ho HIV tanba ema nia hahalok ida ne’ebé labele kontrola dezeju seksual iha moris.
Relasiona ho kresimentu HIV iha Timor-Leste, Daniel Marçal konsidera katak husi problema sira ne’e ita presiza haree mos kondisaun ka fatin disponivél sira ne’ebé ita diskunfia fasilita hela ema nia moris libre iha aspeitu seksual no kuandu tama seksu libre ne’e signifika bele kona ona HIV husi ne’e ita dehan kontribui ba tebes kresimentu virus HIV.
Ligadu ba situasaun jeral HIV iha Timor-Leste bazeia dadus ne’ebé publika husi Ministerio de Saude relata katak Timor-Leste nia komunilativu kazu husi 2003 to’o iha segundu trimester tinan 2026, rezista kazu HIV hamutuk rihun rua atus hitu sanulu resin rua (2712).
