Dili,25/8/2026. Instituto Nacional Combate ao HIV-SIDA, IP(INCSIDA, IP) serbisu hamutuk ho Lideransa Suku Comoro sensibiliza informasaun HIV-SIDA no Moras Hadaet Relasaun Seksual ba komunidade sira.
Atividade sívika ida ne’ebé konsentra iha bairu Delta I ho objetivu atu oinsa fahe informasaun ba komunidade sira no haforsa komunidade sira kuñesimentu kona-ba HIV-SIDA no hahalok risku sira hanesan ransu libre no seksu libre ne’ebé iha poténsia boot hodi hadaet HIV.
Prezidente Instituto Nacional Combate ao HIV-SIDA.IP(INCSIDA.IP), Daniel Marçal deklara ba partisipante sira katak ohin ami hamutuk ho komunidade Suku Comoro tanba preukupa ho situasaun kazu HIV iha Munisípiu Dili boot tebes no impaktu ba komunidade mak sira nia vida.
“Haree ba númeru kazu HIV as ka boot tebes mak ohin loron INCSIDA mai hamutuk ho komunidade hodi ko’alia ba malu hodi buka solusaun hamutuk ba prevensaun HIV ”dehan Daniel Marçal
Ligadu ho kresimentu HIV ne’ebé as tebes iha Munisípiu Dili ne’ebé fó risku boot ba komunidade sira nia vida, Daniel Marçal hateten kestaun ne’e nia kauza tanba ransu libre no relasaun seksual ne’ebé libre ka la seguru. Tanba ne’e presiza iha kordenasaun entre entidade relevante sira hodi estabelese regulamentu sira ne’ebé iha puder legal hodi regulariza atividade libre sira ne’ebé iha poténsia ba transmisaun HIV Iha parte seluk Xefé Suku Comoro, Eligio José Marçal deklara katak HIV ne’e moras ida ne’ebé perigozu tebes ba ema nia moris no futuru tanba ne’e mai ita hamutuk hapara problema transmisaun virus HIV iha Timor-Leste.
